काठमाडौं । पशुपति क्षेत्रमा गीता प्रेस पुस्तक बिक्री केन्द्रको औपचारिक उद्घाटन आज एक विशेष समारोहका बीच सम्पन्न भएको छ। पशुपति क्षेत्र विकास कोषका सदस्य–सचिव सुभाष चन्द्र जोशीको प्रमुख आतिथ्यतामा आयोजित कार्यक्रममा पूर्व सदस्य–सचिव तथा मानब सेवा आश्रमका संरक्षक डा. गोविन्द टण्डन, पशुपतिनाथ मन्दिरका नारायण भट्ट  , वेद–वेदाङ्ग महाविद्यालयका प्राचार्यलगायत विशिष्ट अतिथिहरूको उपस्थितिमा नयाँ बिक्री केन्द्रको शुभारम्भ गरिएको हो।

उद्घाटन कार्यक्रम गीता प्रेस पुस्तक प्रचार–प्रसार केन्द्र नेपालको तत्त्वावधान र गीता परिवार नेपालको सहकार्यमा सम्पन्न गरिएको थियो। कार्यक्रममा केन्द्रका अध्यक्ष जयकृष्ण साराडा–जीले स्वागत मन्तव्य राख्दै गीता प्रेसद्वारा प्रकाशित विभिन्न धार्मिक ग्रन्थ, साहित्य तथा गतिविधिबारे जानकारी प्रस्तुत गरे।

उनका अनुसार नेपालमा सन् २०५८ देखि शुरु भएको पुराण अनुवाद परियोजनाअन्तर्गत हालसम्म १०० भन्दा बढी पुस्तक नेपाली भाषामा प्रकाशित भइसकेका छन्। धार्मिक साहित्यको उपलब्धता र सर्वसाधारणमा आध्यात्मिक चेतना अभिवृद्धिमा गीता प्रेसका प्रकाशनहरू महत्वपूर्ण योगदानकर्ता रहेको उनले बताए।

कार्यक्रमका विशिष्ट अतिथिहरूले पनि धार्मिक साहित्यले व्यक्तिको जीवनमा पार्ने सकारात्मक प्रभाव, समाजमा यसको महत्व तथा गीता प्रेसको निरन्तर सेवामुखी भूमिकाबारे धारणा राखे। गोरक्षनाथका भूतपूर्व भण्डारी गिरिराज रावलले शुभकामना मन्तव्य दिँदै पुस्तक केन्द्रबाट धार्मिक अध्ययन र साधनाको अवसर थप सहज हुने बताए।

प्रमुख अतिथि सदस्य–सचिव जोशीले धार्मिक तथा सांस्कृतिक मूल्य संरक्षण र प्रसारमा यस्ता पुस्तक केन्द्रले महत्वपूर्ण भूमिका खेल्ने उल्लेख गरे। उनले गीता प्रेसप्रति आभार व्यक्त गर्दै धार्मिक क्षेत्रका लागि यसको योगदान प्रशंसनीय रहेको बताए।

उपस्थित अतिथिहरूले नयाँ पुस्तक बिक्री केन्द्र सञ्चालनमा आएपछि जनमानसलाई धार्मिक साहित्य सहज रूपमा उपलब्ध हुने र आध्यात्मिक अध्ययनमा प्रोत्साहन मिल्ने विश्वास व्यक्त गरेका छन्।
कार्यक्रममा विभिन्न धार्मिक संस्था, गुरु–संघ, विद्यालय तथा समाजसेवीहरूको समेत सहभागिता रहेको थियो।