काठमाडौं । सांग्रिला डेभलपमेन्ट बैंक लिमिटेडले आयोजना गरेको ‘तेस्रो सांग्रिला क्विज २०८३’ सम्पन्न भएको छ । प्रतियोगिताको अन्तिम चरण ‘कन्ट्री राउन्ड’मा सहभागी १० टोलीमध्ये दाङ सब–क्लस्टरका पिताम्बर बाँस्तोला र बालिका पाण्डे विजेता बनेका छन् भने इटहरी क्लस्टरका विष्णुबहादुर खड्का र विपुल नेपाल उपविजेता भएका छन् ।

विजेता टोलीले जनही ६० हजार रुपैयाँ तथा उपविजेता टोलीले जनही ४० हजार रुपैयाँ नगद पुरस्कार प्राप्त गरेका छन् । ‘कन्ट्री राउन्ड’मा ‘क्लस्टर राउन्ड’बाट छनोट भएका १० वटा क्लस्टर तथा सब–क्लस्टरका दुई–दुई जना गरी २० जना प्रतिस्पर्धी सहभागी थिए ।

कार्यक्रममा बैंकमा लामो समयदेखि सेवा गर्दै आएका तथा विभिन्न तालिममा प्रशिक्षकको भूमिका निर्वाह गरेका कर्मचारीहरूलाई समेत सम्मान गरिएको थियो ।

विजेता, उपविजेता, प्रतिस्पर्धी तथा सम्मानित व्यक्तित्वहरूलाई बैंकका नायब प्रमुख कार्यकारी अधिकृत उमेशसिंह भण्डारी, प्रमुख सञ्चालन अधिकृत अपूर्व प्रसाद जोशी, प्रमुख कर्जा अधिकृत रजित मास्के तथा रिकभरी तथा एनपीएल व्यवस्थापन इकाइ प्रमुख जयन्द्रबहादुर खड्काले पुरस्कार तथा मायाको चिनो प्रदान गरेका थिए ।

हाल बैंकले देशभर १०९ शाखा कार्यालय र ३० वटा एटीएममार्फत सेवा प्रदान गर्दै आएको जनाएको छ । बैंकले संस्थागत सुशासन, जोखिम व्यवस्थापन तथा आन्तरिक नियन्त्रण प्रणालीलाई थप सुदृढ बनाउँदै आगामी दिनमा सेवाको दायरा विस्तार गर्ने प्रतिबद्धता जनाएको छ ।