काठमाडौँ । यशोधा फुड्स प्रा.लिले निश्चित एक ब्याचबाहेक अन्य सबै ‘करेन्ट हट एण्ड स्पाइसी’ चाउचाउ उपभोग गर्न सुरक्षित रहेको जनाएको छ।

कम्पनीले सोमबार एक सूचना जारी गर्दै खाद्य तथा गुण नियन्त्रण कार्यालयले गुणस्तर सम्बन्धी समस्या औंल्याएको उत्पादन मिति तथा ब्याच नम्बर २०२६/०२/२३-०४ए को १०० ग्राम ‘करेन्ट हट एण्ड स्पाइसी’ चाउचाउबाहेक अन्य सबै उत्पादन खान योग्य रहेको स्पष्ट पारेको हो।

सूचनामा उक्त उत्पादन मिति र ब्याच नम्बरको चाउचाउबाहेक अन्य मितिमा उत्पादन भएका तथा फरक ब्याच नम्बर भएका सम्पूर्ण उत्पादनहरू निर्वाध रूपमा उपभोग गर्न सकिने उल्लेख गरिएको छ।

कम्पनीले उपभोक्ता, खुद्रा विक्रेता तथा अधिकृत विक्रेतालाई पनि सो निश्चित ब्याचबाहेकका अन्य उत्पादनहरू ढुक्क भएर उपभोग तथा बिक्री–वितरण गर्न आग्रह गरेको छ।

यशोधा फुड्सले खाद्य सुरक्षाप्रति आफू प्रतिबद्ध रहेको उल्लेख गर्दै बजारमा उपलब्ध अन्य सबै करेन्ट चाउचाउ गुणस्तरीय र सुरक्षित रहेको जनाएको छ। कम्पनीले उपभोक्तालाई उत्पादन खरिद गर्दा उत्पादन मिति तथा ब्याच नम्बर जाँच गर्नसमेत अनुरोध गरेको छ।