काठमाडौँ । टीभीएस मोटर कम्पनी बिक्रीका आधारमा विश्वको तेस्रो ठूलो टु–ह्विलर निर्माता बनेको छ। पहिलोपटक यामाहालाई उछिन्दै टीभीएसले यस्तो उपलब्धि हासिल गरेको हो।

कम्पनीले सन् २०२५ मा विश्वभर ५४ लाख ६० हजार मोटरसाइकल तथा स्कुटर बिक्री गरेको जनाएको छ। यो संख्या अघिल्लो वर्ष बिक्री भएको ४५ लाख २० हजार युनिटको तुलनामा उल्लेखनीय वृद्धि हो।

त्यसैगरी यामाहाले सोही अवधिमा ५० लाख युनिट मोटरसाइकल र स्कुटर बिक्री गरेको छ, जुन अघिल्लो वर्षको तुलनामा करिब ०.८ प्रतिशतले मात्र वृद्धि भएको हो।

विश्वव्यापी टु–ह्विलर बजारमा होन्डा भने अझै पनि निर्विवाद रूपमा शीर्ष स्थानमा रहेको छ। जापानी कम्पनीले २०२५ मा १ करोड ६४ लाख युनिट मोटरसाइकल तथा स्कुटर बिक्री गरेको जनाएको छ। अघिल्लो वर्ष होन्डाले १ करोड ५५ लाख युनिट बिक्री गरेको थियो।

त्यसैगरी दोस्रो स्थानमा रहेको हिरो मोटोकर्पले गत वर्ष ६२ लाख ५० हजार युनिट बिक्री गरेको छ, जुन तेस्रो स्थानमा रहेको टीभीएसभन्दा धेरै अगाडि रहेको छ।

टीभीएस भारत र नेपाली बजारमा पनि प्रमुख ब्रान्डका रूपमा स्थापित हुँदै गएको छ। भारतमा कम्पनीको बजार हिस्सा करिब २० प्रतिशत हाराहारी रहेको बताइएको छ।

कम्पनीले विशेषगरी इलेक्ट्रिक टु–ह्विलर क्षेत्रमा पनि आफ्नो उपस्थिति विस्तार गर्दै लगेको छ। हाल टीभीएसले युरोप, अफ्रिका, ल्याटिन अमेरिका, दक्षिणपूर्व एशिया र मध्यपूर्वका बजारमा आफ्नो व्यापार विस्तार गर्दै लगेको जनाएको छ।