काठमाडौं, असार १५ । सवारी साधनमा प्रयोग हुँदै आएको कालो सिसा (टिन्टेड ग्लास) हटाउने विषयमा नाडा अटोमोबाइल्स एसोसिएसन अफ नेपाल र काठमाडौं उपत्यका ट्राफिक प्रहरी कार्यालयबीच छलफल भएको छ।

नाडाका अध्यक्ष सुरेन्द्रकुमार उप्रेतीको नेतृत्वमा गएको प्रतिनिधिमण्डलले काठमाडौं उपत्यका ट्राफिक प्रहरी कार्यालयका प्रमुख सुरेशप्रसाद काफ्लेसँग भेट गरी कालो सिसा हटाउने विषयमा विस्तृत छलफल गरेको हो।

छलफलका क्रममा प्रमुख काफ्लेले अन्तर्राष्ट्रिय अभ्यासअनुसार अत्यधिक कालो सिसा भएका सवारी साधन विभिन्न आपराधिक गतिविधिमा प्रयोग हुने गरेको उल्लेख गर्दै सवारी व्यवस्था ऐन, २०४९ अनुसार सवारी साधनबाट कालो सिसा हटाउने अभियान अघि बढाइएको जानकारी दिए। उनले सवारी साधनको अगाडिको सिसामा कालो फिल्म वा अन्य कुनै पनि प्रकारका स्टिकर टाँस्न नपाइने व्यवस्था रहेको बताउँदै सवारी आयातकर्ताहरूले ग्राहकलाई यसबारे जानकारी गराउन आग्रह गरे।

उनले कालो सिसा प्रयोग गर्न सरकारी अनुमति अनिवार्य हुने तथा निर्माता कम्पनीबाटै कालो सिसा जडान भएका सवारी साधन आयात नगर्नुपर्ने पनि स्पष्ट पारे।

नाडाका अध्यक्ष उप्रेतीले सवारी साधनमा पछि टाँसिएका कालो स्टिकर (फिल्म) हटाउने कार्यलाई पहिलो चरणमा प्राथमिकता दिन सुझाव दिए। त्यस्तै, नाडाका निवर्तमान अध्यक्ष करण चौधरीले निर्माता कम्पनीबाटै कालो सिसा जडान भएर आएका सवारी साधनको संख्या धेरै नभएकाले तथ्यांक यकिन गरी व्यवस्थापन गर्न सकिने बताए।

उक्त छलफलमा नाडाका उपाध्यक्ष अभिक ज्योति लगायतको उपस्थिति रहेको थियो।