काठमाडौं । आज विक्रम सम्वत २०८० को पहिलो दिन अर्थात् नयाँ वर्ष २०८० साल ।
आज विश्वभर फैलिएर रहेका नेपालीले विभिन्न कार्यक्रम गरी हर्सोल्लास पूर्वक एक आपसमा शुभकामना आदान प्रदान गरेर नयाँ वर्षको स्वागत गरिरहेका छन् ।

नयाँ वर्ष आरम्भका अवसरमा आज नेपालका सबै सरकारी कार्यालय, सार्वजनिक संस्थान एवम् शिक्षण संस्थामा सार्वजनिक बिदा दिइएको छ । भने विभिन्न धार्मिक स्थलमा नयाँ वर्ष राम्रो रहोस भन्ने कामना गर्नेहरुको भिड छ । त्यस्तै आजको दिन रमाइलो भए वर्षभरी नै राम्रो रहने अपेक्षाका साथ विभिन्न कार्यक्रमको आयोजना गरिएको छ ।
नयाँ वर्षमा सफलता मिल्ने शुभकामना एक अर्कामा व्यक्तै गर्दै र मिस्ठान्न भोजन, भेटघाट गर्दै आज नयाँ वर्ष विशेष पर्वको रुपमा मनाउने गरिन्छ । सफलता प्राप्त गर्न आजका दिन योजना निर्माण गर्ने र नयाँ कामको थालनी गर्ने परम्परा छ ।

स्नान गर्ने, घर, कोठा–आँगन सफा गर्ने, मीठोमीठो खाने, र आफन्त साथीसंगी तथा इष्टमित्रसँग भेटघाट गरी एक आपसमा शुभकामना व्यक्त गर्ने गरिन्छ ।

मल्लकालदेखि नेपालमा मौलिक सम्वतका रुपमा विक्रम सम्वत चलेको हो । नेपालको मौलिक सम्वत् विक्रमादित्यले चलाएकोले यसलाई सम्वतलाई विक्रम सम्वत् भनिएको हो ।

विक्रमको १२औँ शताब्दीमा गुजरातबाट आएका विद्वानले किताब सार्दा पहिलोपटक विक्रम सम्वतको प्रयोग गरेको लिखित दस्तावेज फेला परेको इतिहास भेटिन्छ ।

नयाँ वर्षको अवसरमा राष्ट्रपति रामचन्द्र पौडेल, उपराष्ट्रपति रामसहाय प्रसाद यादव, प्रधानमन्त्री पुष्पकमल दाहाल प्रचण्ड, सभामुख देवराज घिमिरे लगायत, एमाले अध्यक्ष केपी शर्मा अ‍ोली, कांग्रेस सभापति शेर बहादुर देउवा, लगायतले शुभकामना सन्देश दिँदै सबै नेपालीको उन्नती प्रगतिको कामना गरेका छन् ।