काठमाडौं, असार १६ । संखुवसभामा प्रहरी र विप्लव माओवादी समूहबीच गोली हानाहान भएको छ । नियमित गस्तीमा निस्केको प्रहरी टोलीमाथि बिप्लव समुहका कार्यकर्ताले गोली प्रहार गरेपछि प्रहरीले जवाफी फायरिङ गरेको थियो । गोली हानाहामा दुबै तर्फ मानवीय क्षती भने भएको छैन । ।

प्रहरीका अनुसार जिल्ला प्रहरी कार्यालय संखुवासभाबाट प्रहरी निरीक्षकको नेतृत्वमा गएको सात जनाको टोली र सशस्त्र प्रहरी बलको १० जनाको टोलीमाथि सिलिचुङ गाउँपालिका–१ होयाङग्लामा विप्लव समूहका कार्यकर्ताले आक्रमण गरेको जिल्ला प्रहरी कार्यालय संखुवासभाले जानकारी दिएको छ ।

संखुवासभाको सिलिचुङ गाउँपालिकामा विप्लव माओबादी समुह र सुरक्षाकर्मीबीच दोहोरो झडप भएको छ । सोमबार बिहान साढे ९ बजेतिर विप्लव माओवादी समुह र सुरक्षाकर्मीबीच दोहोरो झडप भएको हो ।

लामो गस्तीमा निस्केको सुरक्षाकर्मी र विप्लव समुहका कार्यकर्ताबीच दोहोरो फाइरिङ भएको संखुवासभाका प्रमुख जिल्ला अधिकारी जीवनप्रसाद दुलालले बताए । सदरमुकाम खाँदबारीदेखी एक दिनको पैदल दुरीमा पर्ने सिलिङचुङमा घटना भएको उनले बताए । ‘घटना बिहान साढे ९ बजेतिर भएको हो,’ उनले भने, ‘अन्य कुरा बुझिरहेका छौं ।’

झडप भएको सूचना पाएपछि आसपासका प्रहरी चौकीहरुबाट पनि थप पठाइएको दुलालले बताए । विप्लव समुहले पहिलो फायरिङ गरेपछि जवाफमा सुरक्षाकर्मीले पनि गोली चलाएको जिल्ला प्रहरी कार्यालयले जनाएको छ ।

काठमाडौंबाट मद्दतका लागि थप टोली पठाइयो
संखुवासभाको सिलिचोङ–१ मा रहेको सशस्त्र प्रहरीको टोलीलाई लक्षित गरेर फायरिङ भएपछि काठमाडौंबाट मद्दतका लागि थप टोली पठाइएको छ । नेपाल प्रहरी र सशस्त्र प्रहरीका दुई प्रहरी निरीक्षकको नेतृत्वमा २५/२५ जनाको टोली संखुवासभातर्फ पठाइएको हो ।

सशस्त्र प्रहरी बल, हल्चोकका डीआईजी सुरजकुमार श्रेष्ठले सशस्त्र प्रहरी निरीक्षक शेखरजंग मल्लको नेतृत्वमा २५ जनाको टोली खटाइएको पुष्टि गरे । उनका अनुसार यो लङ् रेन्ज पट्रोलिङ (एलआरपी) टोली हो ।

नेपाल प्रहरीले पनि प्रहरी निरीक्षक शेखरजंग मल्लको नेतृत्वमा २५ जनाको टोली पठाएको छ । प्रहरी प्रधान कार्यालयका प्रहरी उपरीक्षक (एसपी) रमेश थापाले नेपाली सेनाको एमआई १७ हेलिकोप्टरमार्फत मद्दत टोली प्रदेश पठाइएको बताए ।

उनका अनुसार प्रदेश १ प्रहरी कार्यालयबाट पनि थप मद्दतका लागि टोली पठाइएको छ । सशस्त्र प्रहरीले दिएको विवरण अनुसार प्रहरी टोलीले खाना खाइरहेका वेला गोली चलेको थियो ।

कम्तिमा २५ जना हतियारसहित रहेको टोलीसँग जम्काभेट भएको विवरण आए पनि ती व्यक्ति विप्लव समूहको थिएरथिएनन् भन्ने पुष्टि भएको छैन । तर, त्यसक्षेत्रमा विप्लव समूहले गतिविधि बढाएको आशंकामा प्रहरीले सक्रियता बढाएको थियो ।