काठमाडौं । भौतिक पूर्वाधार तथा यातायात मन्त्री देवेन्द्र दाहालले राजनीतिका नाममा नैतिकता नछोड्न प्रमुख प्रतिपक्षी दललाई आग्रह गर्नुभएको छ।

नेकपा एमालेको झापा–काठमाडौं सम्पर्क मञ्चले शनिबार च्यासलमा आयोजना गरेको शुभकामना आदानप्रदान तथा क्यालेन्डर विमोचन कार्यक्रममा मन्त्री दाहालले प्रमुख प्रतिपक्षी दल माओवादी केन्द्रप्रति लक्षित गर्दै यस्तो आग्रह गर्नुभएको हो।

एमाले पोलिटब्युरो सदस्य समेत रहनुभएका मन्त्री दाहालले सरकारबाट केही समय बाहिर बस्नुपरेको भन्दै ईमान र नैतिकता नछोड्न अनुरोध गर्नुभयो। “अहिलेको प्रमुख पक्षमा कहाँ नैतिकता छ?” मन्त्री दाहालले प्रश्न गर्नुभयो, “प्रधानमन्त्री र मन्त्रीहरूका बारेमा अनेक भ्रम फैलाउने, सरकार अहिले ढल्छ भोलि ढल्छ भनेर कुप्रचार गर्ने जस्ता काम किन गर्नु पर्यो?”

गणतन्त्रले केही दिएन, व्यवस्थानै खराब भन्ने र नकारात्मकताको प्रचार गर्नेहरूले सिर्जना गरेको भ्रम चिर्न जरुरी रहेको उल्लेख गर्दै, दाहालले ‘मिशन ८४’ को कुरा मात्र नगरी जनतामाझ पुग्न कार्यकर्तालाई निर्देशन समेत दिनुभयो।

पूर्व–पश्चिम राजमार्गलाई एशियाली मापदण्डअनुसार बनाउने काम भइरहेको, हुलाकी, मदन भण्डारी, र मध्यपहाडी राजमार्ग निर्माणमा गति आएको, आगामी दशैंअघि आधुनिक सुरुङ मार्ग सञ्चालनको तयारी भइरहेको, र उत्तर–दक्षिण करिडोरहरूले दुर्गम क्षेत्रसम्म सडक सञ्जाल विस्तार गरेको उल्लेख गर्दै मन्त्री दाहालले भएका उपलब्धिहरू जनतालाई जानकारी गराउन जोड दिनुभयो।

कार्यक्रम मञ्चका कार्यवाहक अध्यक्ष मनोज दाहालको अध्यक्षतामा सम्पन्न भएको थियो। कार्यक्रममा पार्टीका अन्य नेताहरूले पनि सम्बोधन गरेका थिए।