काठमाडौं, भाद्र २६ । नेपाली सेना तथा अन्य सुरक्षा निकाय परिचालन भएपश्चात् मिति २०८२ भाद्र २५ गते बेलुकी १८०० बजेदेखि भाद्र २६ गते बिहान १०३० बजेसम्म विभिन्न सुरक्षा गतिविधिहरू सम्पन्न भएका छन्।

सप्तरीको राजविराजस्थित जिल्ला कारागारबाट भाग्ने प्रयास गरिरहेका १९२ जना कैदीलाई नेपाली सेनाले नियन्त्रणमा लिएको छ। साथै, कञ्चनपुरको चाँदनी क्षेत्रमा भारततर्फ भाग्दै गरेका ७ जना कैदीलाई भारतीय सीमा सुरक्षा बल (एसएसबी) ले नियन्त्रणमा लिई नेपाली सेनालाई बुझाएको छ। १ जना कैदीलाई स्थानीयले नियन्त्रणमा लिई इलाका प्रहरी कार्यालयलाई बुझाएका छन् भने १२ जना कैदी आफैं कारागारमा फर्किएका छन्।

यसैबीच, रामेछापस्थित जिल्ला कारागारमा कैदीहरूले बाहिर जान पाउनुपर्ने माग गर्दै गरेको झडपलाई नियन्त्रणमा लिन सेनाले चलाएको गोली लाग्दा १२ जना कैदी घाइते भएका छन् भने २ जनाको मृत्यु भएको छ।

त्यसैगरी, काभ्रेपलान्चोकको बनेपा-९ नयाँ बस्तीमा फेला परेको शंकास्पद वस्तु सेनाले सुरक्षित रूपमा डिस्पोज गरेको छ।

हालसम्म सुरक्षा निकायले ९४ नाल विभिन्न प्रकारका हतियार बरामद गरेको जनाएको छ।