काठमाडौँ। टाटा मोटर्सका लागि नेपालको अधिकृत वितरक सिप्रदी ट्रेडिङ प्रा.लि. अन्तर्गत टाटा टियागो ईभीले बुढानीलकण्ठ स्कुल, आर्ट क्लब र सिप्रदीयन सहायता संस्थासँग सहकार्य गर्दै cARTnival अन्तर–स्कुल चित्रकला कार्यक्रम बुढानीलकण्ठ स्कुलमा भव्य रूपमा सम्पन्न गरेको छ।

कार्यक्रममा १० निजी र ६ सामुदायिक विद्यालय गरी १६ विद्यालयका ३७७ भन्दा बढी विद्यार्थीले उत्साहपूर्वक सहभागिता जनाएका थिए। साथै, १९ जना पेशेवर कलाकारहरूको उपस्थितिले विद्यार्थीहरूलाई प्रेरणा तथा कलात्मक मार्गदर्शन प्रदान गरेको थियो।

चित्रकला कार्यक्रम कक्षा ५–८ र कक्षा ९–१२ गरी दुई समूहमा सञ्चालन गरिएको थियो। प्रतियोगिता र कार्यशालाको संयोजनमा सञ्चालन गरिएको cARTnival ले वातावरण, दिगोपन, आधुनिक गतिशीलता तथा नवप्रवर्तनजस्ता समसामयिक विषयमा विद्यार्थीहरूको सिर्जनशीलता उजागर गर्ने अवसर प्रदान गरेको आयोजक संस्थाले जनाएको छ।

उद्घाटन कार्यक्रम बुढानीलकण्ठ स्कुलकी उपप्राचार्य पुर्णिमा लामा, सिप्रदी ट्रेडिङका पेसेन्जर सेग्मेन्ट प्रमुख सावन्त जङ्ग सिजापति तथा टाटा मोटर्सका दक्षिण एशियाका रिजनल कस्टमर केयर म्यानेजर रन्धीर कुमार चौधरीको संयुक्त उपस्थितिमा सम्पन्न भएको थियो।

उद्घाटन समारोहमा प्रिन्सिपल केशर खुलालले विद्यार्थीहरूको कला अभ्यास, सिर्जनशीलता र आत्मअभिव्यक्तिलाई प्रोत्साहित गर्ने यस्ता कार्यक्रम विद्यालय विकासका लागि आवश्यक रहेको उल्लेख गरे। त्यस्तै, सिजापतिले कला मनोरञ्जन मात्र नभई सोच, दृष्टि र कल्पनाशक्तिको विकासमा महत्वपूर्ण भूमिका खेल्ने माध्यम भएको बताए।

Move with Meaning सामुदायिक अभियानअन्तर्गत आयोजित यस कार्यक्रमले युवा पुस्तामा वातावरणीय चेतना, सामाजिक जिम्मेवारी र कलात्मक अभिव्यक्तिलाई सशक्त बनाउने उद्देश्य लिएको आयोजकहरूले जानकारी दिएका छन्।

अन्त्यमा, सिप्रदी ट्रेडिङ र टाटा ईभीले भविष्यमा पनि यस्ता सामुदायिक, शैक्षिक तथा सिर्जनात्मक पहलहरूलाई निरन्तरता दिंदै समाजमा सकारात्मक प्रभाव कायम राख्ने प्रतिबद्धता व्यक्त गरेका छन्।